To oće reć ka kad se ono dica igradu na sakrivalo.
Ta mi rič anci svaki dan ide po glavi, pa se sitin, koliko smo ka dica guštali igrat se na kukalo, kakva smo sve mista nalazili, di bi se sve utiravali i čekali da se oni ča kuka bokun makne od mista 'spasa', pa da istrčimo, taknemo to misto i zavičemo jen, dva tri, moj spas!
Asti ga mande sriće i vese'ja.
A di je sad spas?!

 

 

 

Ma danas jema isto je'na velika igra koja nima imena, njanci slova, ali jema numer, velik, dugi numer. I pari mi se jedino smišno u ten numeru ča jema puno nula, ni manje ni višje vengo pet nula. To na kraju dojde ka mlogo puta ništa. Ka ono kad Runje ča namišča alku zaviče: u ništ-a-a-!!!

Svitu moj, sve se modrenalo svak oće pokazat kako je brži vengo je bija, bo'ji, i to oće pokazat svakako na europski, na svitski način. Ma, ja san mislila da će ti svit barenko izvanka ostavit čovika da ga vidimo, da mu ne će sakrit ime i bezime, da će uvik jemat svoj indiric i da ćemo ga, kad bude tribalo, uvik nać na radnome mistu. Privarila san se.

A ondac su izvanka došli  niki naši judi koji su jemali najbo'je ricete za brzi spas Domovine. Pokazali su u pravo vrime pune takvine, dobro nas išempjali i mi smo i' omar štivali na najbo'ja mista.
Gospe moja, kakvi smo mi dobar i milostiv svit, da ne rečen, narod. Ne razumimo mlogo tega, ali oćemo sviman dat priliku. Najskoli triba slidit vrime i njegove dare, razumit i kad ne razumiš, sve privatit samo da je izvanka, da ni naše, jerbo drugovačije ne more bit IN.

Moje je vrime pasalo i ne mogu vengo guštat plodove.
Ni triba ulizat u znanost i velike stvari, jerbo je život najčešće notan u običnin malin stvariman.

Evo na! Prin niko vrime, kad bi ti krepa telefon oli morebit modem od interneta, jema si notano di' š zvat, koga' š tražit, pa kad bi završija diškorš lipo bi zamolija ime i bezime osobe s kojon si razgovara, jerbo će ti jopet tribat, pa da ne zafrkaješ cilu četu svita, zna si omar koga tribaš zvat.
Ma, ti se dobri judi nisu snimali ka glumci, nisu ni ostav'jali befele, ka: svi operateri su zauzeti,  pa pustidu mužiku.  Nisu se jav'jali ni snim'jenim reklamama, njanci nudili puste usluge i numere koje moraš upirat da doznaš ča tribaš činit, ajmo reć za tehničku pomoć, prijavu kvara, nabavu, ča ćemo poć govorit, pa ondac ako' š reć koju ča misliš o njiman... pravi teatar.

Finalmente zaudobiš zašto si zva i ča ti je tribalo, i kad jopet čuješ mužiku pari ti se da to sad njav'juju tebe, da' š sad ti dobit rič, ma ne, falija si. Jopet se javi glumac i reče ti da ne prikidaš kad rečeš ča si triba, nego da rečeš koju o njiman, ča misliš kakvi su, jesu li dobri?

 

Kad se osvistiš, dočeka te pravi pravcati glas živega čovika i ondac, tako u tri-četri bote, dobiješ priliku reć ča ti je, zašto zoveš.
Ne pitadu te ime, ča će 'in, jemaju oni tvoj numer.

Kad san se prin nikoliko miseci prvi put srela s ovin vanzema'jcima i zaigrala na prvo kukalo, kad smo navalili na posal, jemala sam tri telefonska razgovora, svaki put s oni nesriknji' pet nula, svaki put, kad bi prispila do živega glasa bija je nikako drugovačiji govor, ka da nisu odavle, ondac san doznala, jedan put je glas bija iz Osijeka, jedan put iz Vinkovaca, jedan put iz Rijeke… Tako san imala razumit da se na te puste nule jav'jadu svi iz Rvacke, pa ko prin dospije, a ondac ono ča meni triba dojavidu mome gradu. Asti sto miši!

ča je bilo prin dva tri dana? Krepa je modem. Nazoven ja te nule, dva puta su me omar prijavili mome gradu, ne glumciman, lipo su pripovidali ma ništa nisu učinili, a ne mogu reć ni ča jesu, jerbo se višje nikor nije javija.
Ondac se popodne nakon svih glumaca i reklama javila jedna fina Lejla.
Gospe moja, ča ste fini, rekla san joj. More bit ste vi prava osoba i ispričan joj cilu štoriju.

Je, a ondac me je omar stručno svitovala da ovako telefonskin puten postavin zahtjev za novi modem na dvi godine sve za 50 lipica, da rečen jedinstveni matični numer i sve će bit, a kako nego onako, OK!
Kad i ko će to donit pitan ja brzo o' straja, da Lejla ne nestane kad je napravila posal.

Distributer u roku od trideset dan, odgovori Lejla.
A oklen, kad?, pitan ja.
Asti ga mande, a jema li to di za kupit, pa da sama to vazmen i donesen kući, znan ga i sama spojit, majčin sine!
Ne znan, odgovori Lejla.
Ma kako ne znate, pa di vi živite, di radite, mogu li doć do vas? Još dodan, znate vi, kad je za'nji put bija vaš čovik reka mi je da ubuduće kad ih buden tribala omar javin, jerbo smo in mi, moja fameja, dopustili u našen portunu koji se zak'jučava da postave u gvozdeni armerun sve moguće žice, kabele i instalicije. Jema dana kad nan zvonidu i po pet puti da in otvorimo da ulizu da mogu radit i doć do svojih žica.

- Zaslužili ste -, kaže on, da trčidu kad van ča zatriba!-
E moj svitu, dodan još mi je kuća tu priko puta vas, moremo jedni drugin ruku dat, a vi tako.

Ma, dok san sve to govorila ositin, da me Lejla ka ne razumi i ondac mi reče da ona radi i živi u Rijeci odaklen i razgovara smenon.
Ma di, ma ča, ma ko u Rijeci?
Ostala san inkantana. Lejla reče da je sve notala i da će bit sve, kako oni rečedu na rvacki OK!
Ma sutradan iza OK! stari je modem proradija i ja jopet zoven, dobijen je'nu drugu ženskicu i avižan je, da je sve u redu. 
ča je sad? Je li se moj zahtjev za novi modem poništava kad je ovi proradija?
Ne, odgovori nova ženskica iz jednega drugega grada, i ja ću tako dobit nov novcati modem.

Ondac pomislin, u ovo čudno vrime kad svi lažu oš' drito u brk oli priko snimke, more se dogodit, da ti namjerno isk'juče, ka ono, ne moreš izać na internet, pa ti svituju da podneseš zahtjev za novi modem, za 50 lipica, ondac jopet popravidu stari, novi ne moreš otkazat i eto posla. Distributer ne će arivat jer nema ča radit, jer je sve kako triba.
More bit je i to posal?
Zavridili su deset a ne pet nula.
I sve to priko telefona, nikoga nisi vidija u čunku, svi su vanzema'jci, nikor ne odgovara,
nikor nije kriv,
svi su se sakrili,
igraju se na kukalo,
samo višje nima diteta koje će dotrčat i zavikat jen, dva tri moj spas.

A oni će mi reć i nula je broj,
a ja in odgovaran, ma more bit i slovo kad se ja najidin!

I ondac, kad san mislila da je finilo zazunzi mobitel i jav'ja niki glas da izajden na ulicu da nosi je'nu škatulu za me. Gospe moja, uzdrčale su mi se noge, spustin se, potpišen niku kartu da san priuzela paket, pozdravin i zafalin se.
U paketu je bija novi modem. Je, je, va'ja reć po duši, napravili su posal, nisu me privarili, skinut ću in omar pet nula, ma oni njiovi pet moran ostavit na miru, pa nek se da'je sakrijedu.

A ko će instalirat novi modem, ovi ni isti ka oni stari, ne znan? Ajme!
Eto zašto paket dobiješ na ulicu, jerbo nima ko doć kući napravit posal. Zapravo paket van donese čovik-privoznik koji nima veze s vašin modemom. On i ne zna ča van je donija.

Oni koji bi to triba napravit i spojit je osoba oliti firma s kojon su se ovi ča su poslali modem pokarali. Niki i' zovedu kooperanti. Ne volidu se i gotovo, je'ni drugiman smetaju i pravidu dišpete, guraju se. Kažedu da se to reče konkurencija, oliti nadmetanje. A čime, Gospe moja, da mi je znat?

Svitu moj, nima tega na svitu ko bi me jopet natanta tražit te druge po nji'ovim nulama, slušat nji'ove glumce, mužiku i reklame. Jopet in dodajen nazad pet kazneni' nula.

Finalmente doće i meni čovik koji ni konkurencija ni kooperant, ma jema ime i bezime,
jema svoj numer o telefona i mobitela. Kad mu javin ne jav'ja se glumac, ne svira mužika, ne krede Bogu dane, nima vrimena za reklame, oće radit i nikor mu u ten ne smeta i ča je najlipje nima njanci jednu nulu u broju o telefona.
 I takvi će spojit moj novi modem.

 

Nima višje na kukalo!

 Judi moji, jen, dva tri moj spas!

I to na 33 stupnja u kamari.

Zdravi i veseli bili!

Split, 31. srpnja 2009.