Na dane bi čovik mora letit da bi priskočija šporkicu, ne samo onu po tleju vengo i onu, još grubju, koju ka da nima ko bi je opra i očistija: šporkicu u namin.
Morebit da je ovo bija dan kad smo tribali ostat kući a ne afanavat prid nevojan.
Kraj stare Prime jema nikoliko klupic, na kojin svit sidi i čeka, sa spizon i boršan dok dojde autobus. Do kanta o' škovac jema još dvi-tri, a povrj nji, ka veli razvučeni kapelin, splele se smokvine grane s kaparan, nagnile se iz Jelaskina đardina i napravile lad. Tu se svi guraju uvatit bokun mista, najskoli muški.
Prin malo vrimena tu bi dolazila i jedna starica s vrićicon i botijon. Pomalo bi pila i dozivjala. Oko nje bi se skupija kurjožasti svit, a ona i je zabavjala. Kad bi se umorila, pružila bi se priko klupice i zadrimala. Bilo bi to u doba obida, kad bi klupice bile prazne.
Ne vidin je višje. Morebit da je ovi put zapravo zadrimala.
U nediju jopet prolazin tin puten. Meju muškin na klupican, stoji jedna ženica. Posli mise u Gospe o' Zdravja, čeka autobus. I nju je dopa bokunić lada. I ne samo to.
Pari mi se da je bila rič o zločincin. Svi su govorili u isto vrime i vikali. Najjači, najglasniji se isprsija i diga šćap u arju i reka: - Ja ću van reć ko je najveći zločinac. Ja znan. - Svi su stali i čekali šta čedu čut. Kad su svi umukli, on, u velen zanosu zaviče: - Najveći zločinac je Bog! -
Morebit da se kumpanji na klupici puno i ne razlikuju? Morebit da su tu zajedno samo radi lada, ali svi su ostali incukani. Ne mora bit da su s Bogon u dobre, ma in ne smeta.
Žena koja je tu čekala autobus, urtana, rekla je: - Ajme meni, ma ča govorite? Da Bog zločinac? U ime Isusovo! Ovo nisan nikad čula. Kako vas ni straj o' Boga? -
Nastavila san put. Glavon mi letidu pitanja, jedno za drugin. ča se to dogodilo čoviku? Joli velo sunce, zvizdan? ča mu se to pomišalo, u ča se pritvorija? Di je to čuja, di naučija? Je li to čovik joli prisvučeni đaval?
Mislila san o ten cili dan. Ondac san navečer, poslin mise u isusovaca, s rodicon sila na bibitu. Još ni bilo mlogo svita, ali za velu nevoju, omar je iza našega stola sidilo, pari mi se, dvoje-troje judi, meju njiman i jedna ženskica. Jedan od njizi ni fermava arleukat. Gospe moja, ča je ovo danas? ča je oven svitu oko nas? Najprin je čapa konobora, da odakle je. Kad je on reka da je iz Ercegovine, poludija je. Govorija je da i vaja sve pobit, da ji nima, da in triba sime iskopat… Judi moji, ovo malo svita uokolo umuklo od muke, ostali smo ka zarobjeni. čovik je pijan, napada sve, svakega, priti. Nima sile koja će ga slomit. Koje beštimje, koje kletve! Na ovon mirnon mistu, ka da je zapalija lomaču. Nikor ni rič ni izustija, bili smo kuntenti da nan ni doletila koja čaša. Pijani, raspamećeni čovik je po sata vlada s ovo bokun mista, pritija i sve nas umrta.
Di su čuvari reda? Nima i. Iston je batilo sedam. ča će bit do ponoća?
Prin niki dan, jedan je diškul, usrid bila dana, uvatija mladi par, nike strance, dogura i' i utira u trafiku, naručija sve ča mu je falilo, učinija i da platidu konto, a onda i je potira iz trafike i prisilija da trčidu. Bidni, uvatili su se za ruke i, ka strila, letili su niz ulicu, prema Pjaci. A on je sta, gleda i' i junači se prid jud'man koji su onod prolazili.
Bilo je tri ure popodne. ča je ovo? Di smo arivali?
Na jednen psihijatrijskon odilu, u tri posteje, trojica mladaca. Jedan cilo vrime zapovida: - Šmrči, šmrči! -. Drugi se jedva probudija od Hari Hrišne, izlapija je. Ne zna za se, a treći zapovida materi, koja je došla u vižitu: - ča je? Jesi li obećala kupit auto? Pa, ča si učinila? Ništa. Jesan li ti reka da motor ne ću vozit zimi? Rekla si da moraš vazest kredit. A ča si ti učinila? Ništa. Pa, ča si ondac došla? Nimamo višje ča govorit. -
Jema još jedna posteja. Zavezani se mladić ne budi. čača mu jednon rukon pokrija čelo a drugon je uvatija njegovu ruku i drži je. Vidi se čačina škina i cilo tilo kako drče o' plača, koji nikor ne more čut.
Di su falili? ča su zaudobili? ča i je toliko išempjalo da nisu vidili kako in dite, tu, isprid nosa, gre u propast. Mijun pitanja vrti se u čačinoj glavi.
Dižgracija.
Svitu moj! Život je da se živi, kako užaju reć, punin plućin. Je, tako je.
Ma ja bi volila da nikor ne dojde do policije i psihijatrije, jer kad se dojde do njizi, ondac svit zna reć da je vrag odnija sve. Oće reć da je ondac kasno i da je teško pomoć.
Znan da danas ne bi bilo lako pomoć onen muzuviru ča je reka onako grubo o Bogu, ni onen ča je napravija oniki nered, arlečuć i beštimjajuć na sve živo, vriđajuć maleg Ercegovca, a da ne spominjen one bidne na duševnon odilu u ošpidalu. Divjanje i arčenje ni se dogodilo priko noći. Mlogo je to duralo. Pari da je fameja gluva, društvo mutavo i sve je išlo u vitar.
Judi su jopet zaboravili na vrime, utrnija se razgovor meju sviton. Nesrića se razbižala, vrime pobiglo.
U mobitel s porukon mo'š poslat iston napravjen litrat, ne samo da ne tribaš višje govorit i trošit riči, vengo se višje ne tribaš njanci vidit. Eto ti napridka!
čovik se more rodit bez prsta oli s nikon drugon manon. Ma, svaki se rodi s dušon. Ona je najvridnije ča čovik jema. Nju triba ašištit, teplit je, prinašat jon dobro i zalivat je da ne uvene. Triba je čuvat ka da je o' cakla.
Ma, i za dušu triba vrimena, mlogo vrimena, koje će jon dat najprin čača i mater, ondac i svi drugi, ako se ne inkantaju u niko drugo, novo i meni nepoznato bogastvo.
Split, 26. lipnja 2007. god.