Prin višje o' dest godišć, potla operacjuna, u bolesničkoj kamari ležale smo, dvi ženskice i ja. Jedna je bila iz Zagore, druga s otoka i ja odavde. Ma, bolešćina je bila ista, 'županijska'.
    Prva koja je bila ka kapo o' kamare, otila nan je reć da je njon pinku lagnje, jerbo je iz istog mista ka i dotur i da jon nikor ne bi bija učinija ča on, kad je arivala na prišu u ošpidal. Falila se pinku priko mire. Ka ono, cilu noć su je vodili o' jedneg do drugeg aparata, da bi točno vidili ča se to dogodilo u njezinon drobu. - Prošli su s menon sve aparate u bolnici.-, govorila je. Ne ću da'je, ni lipo.
    Ja virujen da bi ti likar to bija napravija i za nas druge. Ma, mi se bidni oćemo malo pofalit, barenko u bolnici, kad to ne moremo u fameji oli na poslu.
    Na drugoj je posteji ležala ženskica koja je malo pripovidala. Ona je znala da ni dobro i navečer bi s menon molila Ružarij.

 

 

    Ne ću je nikad zaboravit, jerbo mi je ispričala ča je sve učinila da bi mogla vazest kredit i prominit ga u pineze. Išempjali su je i rekli jon da prez tega ne more na operacjun. To su jon svitovali mišćani. Nisan virovala u to. Bilo mi je žaj ča je nisan prin susrila.
    Molila je Boga da jon dâ vrimena barenko otplatit kredit pa nek je pozan tega vazme. Ne znan je li, bidna, dospila vratit dug?
    U to vrime, nikako ka i danas, bila je u fojin 'navala' na ošpidal, na doture. Ni mi bilo lako ulist. Bila san puna straja. Mislila san puknit.
    Osan dan ča san provela u ošpidalu, operirana san i previjana. Upoznala san svita o' spremačic', do medicinski sestric' i likari.
    Nikor ni bija drugovačiji prema meni, jerbo nisan vazela kredit, niti san se osićala manje vridna ča ne poznajen nikog o' njizi. Upoznat ćemo se, jema vrimena, a i nalaz ni bija za pofalit se, pa san znala da će naše poznanstvo durat bokun du'je.
    Za dva miseca bi' će jedanćst godišć o' tega. Nike san ambulante i likare zapametila i ne ću i' nikad zaboravit. Ti su judi postali ka i moji prijateji.
    ča reć na sve ča svit pripovida, a svi govoridu ka 'iz prve ruke'? Grubo.
    Ona mi je najbo'je odgovorila i fala jon. To je i moj odgovor i pitanje svin i cilon svitu.
    Je li van ikad ikor o' doturi odbija pružit pomoć oli vas operirat, jerbo niste digli kredit, jerbo niste donili pineze, joli vas zato potira iz ošpidala, uskratija van ličenje? Je li vas koji dotur pita da mu date pineze? Sigurno nije. To ča vi činite pa oćete o ten pripovidat i falit se, zato se sramujte. Jema nas svakakvi', more bit tako i meju likarin, ali ne mo'š zato cilu struku popjucat. Ne vaja!
    Kad san rekla sestrican da ću i' pofalit u Slobodnoj rekle su: - Ajme, dražje bi nan bilo to nego bilo kakvi pinezi, jer ovo ča činidu s ošpidalon prišlo je svaku miru... -
    Kad san izašla iz ošpidala, u studenon 1996., otila san se zafalit sviman i napisala san nikoliko lipi', juski' besida i dala u Slobodnu Dalmaciju. Jedva, jedvice san uspila. Pitanja ka: - ...Pa di ćemo s tin...? - Oćemo li meju šonete? Oćemo li u oglase? Ne znan. Moran pitat urednika, pa šta on reče…. Nazovite posli… - I jopet u ništa!
    Po dana san se telefonski dogovarala, kako i di, a ondac mi je puka živac i rekla san: - U kakve šonete?! Kako vas ni sram? Stavite zafalu na stranicu di ste nikidan tukli po ošpidalu... - i rekla san in, da ću nazvat ured prisidnika države i prijavit njiovo ponašanje. Ja nisan politika. Ka obični, mali čovik, oću reć dvi beside za ošpidal i te jude i ko mi to more zabranit? Smi li se dogodit da čovik ne more napisat ništa lipo i to stavit u foje? Da san napisala napr. da u kondutu ni bilo karte, ne bi rekli da ne znaju di će tu vist stavit, vengo bi je omar fikali na prvu stranicu.
    Uspila san, nakon velog natizanja. Svi su u fojin proštili zafalu i bilo in je drago da i' se nikor sitija.
    Opetujen, koliko god zlo bude reslo i guralo se meju nan, da napravi dižgracju, ne pridajimo se, fermajmo ga s miron. Tak'e nas Bog voli i nikad nas ne će ostavit na cidilu.