Zazvonija je telefon. - Fala dragon Bogu da san te naša! Di si nestala? Nidir te nima.
Zoven te treći put. Slušaj, sestro! O'kad si me zvala radi onega nesriknjega čovika, cilo mi se vrime vrti po glavi. Bo'je bi bilo da ga nima. Ma, kad je tu, ajmo čakod učinit za nj…! -
- Slušaj, brate! - nastavja ona, pridlaže, govori ča će napravit, di ić', potla svega reć čoviku, uredit ga i pripravit za dom. On zna da tražidu misto za nj.
Roba koju je skupjala oprana je i šumprešana. Eno je u dvi kartonske škatule na tleju. Triba još poć u ambulantu vazest karton…
Ne bi otila prinosit sve ča su razgovarali. Inšoma, dogovorili su se da nesriknjega čovika triba omar sutra dovest.
Da bi sve ispalo kako triba, tu je bila i ženskica iz socijale, prez koje nima gotoveg posla. Njezina je za'nja. Socijala će plaćat dom i ličenje za ovega sirotana.
Judi moji, otila san reć da u cilen radnon viku nisan čula da judi ovako lipo razgovaradu i dogovaradu se, da jedno drugon nazivjedu: - Brate! sestro! -
Ne' š višje čut da je brat sestri reka - Sestro! -, ni ona njemu - Brate! - a kamoli ovako u poslu…
Još razgovaradu. Sidin inkantana. Slušan i' i ne virujen da i tega jema. Pričadu o juskoj nevoji, ka da je njiova, začinjeno i prikidano s lipon besidon: - Brate! sestro! -
Ma, ja mislin, da bi se izreklo tu besidu moraš bit dobar s čovikon, moraš mu virovat, ne smiš ga iznevirit. Ni on tebe. Moraš s njin dilit piz o' posla i odgovarat s njin za naprav'jeno, kad je dobro i kad nije. Mora bit sigur u te i ti u nj. Moraš bit čovik. Ondac je posal gušt i kad je teško.
Ovi tote na telefonu, brat i sestra, nisu u rodu. Oni se po potribi, s vrimena na vrime, dogovaradu ča i kako pomoć onin najmanjin o' malešni'.
Reka bi naš svit: - Ma, vidi i', kako su se lipo našli! Mirita i' slušat! -
Ove dvi lipe beside ne more nikor izbacit iz ričnika. One se mogu duperat višje oli manje. More i' izmamit samo čisto srce i jubav za čovika, brata i sestre, koje nan je Bog stavija na put ka odmorišće, ajmo reć, ka ruku pomoćnicu.
Niki dan su jedan likar i jedna medicinska sestrica bili brat i sestra, kad su, u svojon službi, otili pomoć jednen siromaju, koji nikako ni moga razumit zašto bi njemu nikor tija pomoć?
Siguro na svitu jema još mlogo tak'e braće i sestric… Triba samo pinku usporit, ulist u mir, deliberat se o' navale medijski' osvajač i silovate'ja.
'Ajmo i' tražit! 'Ajmo bit pomoć! 'Ajmo radit ono ča znamo…! Ako moremo samo slušat i to je mlogo, i to triba znat. To mlogima triba.
Izajdimo! More bit da vanka intramo na jednega o nji': na brata joli na sestru?
Split, 29. kolovoza 2007.