Kad se gradi, kopa, naprav'ja, širi, vavik se dogodi da ostane nika kuća, dil o' dvora, bokun stare iskriv'jene ruzinave žice, kojon je kuća bila opasana, komad zidića. Ne srušidu je. Je li to zarad tega da se vidi da svako vrime jema i pinku duše? Ma, prin će bit da se mirodavni nisu mogli nagodit s vlasnikon pa sad čekaju da vrime napravi svoje. Jer oto misto triba bit čisto, prez kuć. More bit da će brzo tako i bit? Kako je da je, ja se svaki dan iznova zagledan u tu starinu i vavik gledan na vrj, u škure ispod starih šarenih kup'. Jav'jadu da je 35 stupanj'. Žeže. Upeka katran. Okolo starine vonjadu tonobili. U ovi dan, jema i' malo, jerbo je nedija. U staren je dvoru izgorila trava. Šipkovo je cablo ostalo neobrano. Sušidu se požmarili plodi i gredu u se.
Priskočin očin dva poda i ferman se na dvi ponistre o' šufita. Tri's pet stupanj'. Otvorene škure, koltrine prez muštre, razapete ukrivo. S live i desne bande po pitar đirana. Svit kaže da je điran najjači meju pitarin. Mora bit da je tako, jer i ja ozdal vidin da se crvene cvitovi. ćutin vonj o' šalše. Vrime je od obida. Ne virujen da dopire ozgar. Jučer je bilo puno grubo. Iz šufita je grmilo, karalo se, beštimalo, klapalo… Prava nevera. Ko je da je, meni i' je žaj. Kad projden naprid, svaki korak kapje voda o' klime, ladimo se, a onod gori, blizu nas, svit samo ča ne izgori. Ondac ni teško pošempjat. More bit se oni gori ne možedu spružit ni stat drito. ča tote mogu skuvat? Da nima kup' povrj nji' da je omar nebo, more bit da bi in bilo lagnje, more bit da bi se nacrta koji oblak i zaštitija i'? Vitar koji bi zapuva, najskoli majštral u podne bi in' da pinku arje i rešpira. Ništo me vuče da jopet projden, da pogledan gori, da vidin koliko su bližje nebu od nas koji se ladimo i sakrijemo u svoju lipost, na teracu, pod smokvu, uz more i kunjamo infišani ka da smo takli sriću. Doli, na tleju, pod škuran rakvašen kruv za rebce i golube. More bit da su in oni njiova jedina vižita ove nedije?
Split, 26. kolovoza 2007.
|