Bartul i Domina vazeli su se jur stariji i nisu jemali dice.
    Ma, Bartul je u prven braku jema ćer. Ona živi daleko.
    Domina jema nećake.
    Kad je bolešćina okovala, oboje je tribalo svakojaku pomoć. Redit i' ranit i', prat in robu. Sve ča triba starin judiman.
    Lipi stan u kojen su živili bija je Bartulov.
    Ne znajuć ko će prin partit, nećaci išempjaju Dominu i nagovoridu je da traži od Bartula da pripiše stan na njezino ime. Bilo je to prin višje od deset godin'. Domina i' posluša, a Bartul jin udovo'ji i stan pripiše na Dominu.
    Prošlo je puno vrimena a i oni su postali betežniji. Kad je Bartul pa i kad je tribalo rumbat vrata, jer nikor ni dolazija osin susida, zvali su vatrogasce.
    Od tega se dana nisu višje zatvarala vrata o' stana. Doputovala je ćer i dogovorila sve ča triba, pomoć i službu.
    Dominini nećaci nisu se odazivjali na pozive da su Bartul i Domina slabo, vengo su rekli da su na odmoru i da ćedu doć poslin.

    ćer je po'ranila Bartulovu ušteđevinu. Bila je i u Pogrebnon dogovorit sve ča triba ako umru, tako da ne bi bilo nikakvih teškoća kad čača oli teta umru.
    Ma, ondac je meju kartan našla dokumenat, kojin njezin otac stan pribacije na Dominu. Razgovarala je s njiman i rekla da to ni pošteno naprav'jeno. Domina je priznala da su je na to nagovorili nećaci. Pristala je prinapravit kartu da jopet bude kako va'ja i kako je bilo. Tako se stan jopet vratija polovinu u Bartulovo vlasniš'vo a polovinu u Dominino. Bartulova je ćer otila da bude polovina na Dominino ime, iako je stan bija čačin, jer je to 'juski. Ne zna se ko će prvi partit, pa neka su oboje osigurani.
    Ma, triba reć da nećaci ne znadu da je Domina prinapravila teštament i da se pridomislila, da će jin pozan nje ostat samo po stana.
    Bartulovo se zdrav'je pogoršalo. Mora je u ošpidal. Poslin petna'jst dan je umra. Sve ča je tribalo bilo je napravjeno. Doputovala je Bartulova ćer. Dogovorila je nastavak pomoći za Dominu i išla natrag. Pinezi su ostali po'ranjeni i u nji' nikor ni dira.
    Domina je ostala sama sa svon mogućon pomoći.
    Ma, sad su prispili i nećaci. Najprin su tražili o' tete da reče di su Bartulovi pinezi i omar su počeli razgovor o odlasku u dom. Domina je jedan put rekla da oće u dom pa da ne će. Sad se zna da čeka misto u jednen domu, a do tada će je nećak vazest kući.
    Prin tega dozna je di je Bartulova ćer po'ranila čačine pineze. Iša je u odvitniku i izjavija je da vazim'je svu moguću brigu za tetu Dominu. Sve, svitu moj. Sve je nabrojija ča će činit, ovirija je to pečatin i otiša tražit po'ranjene pineze.

    Ma tu je pinku zapelo. Pinezi se moredu izbrojit samo onen ko i' je položija, a to je ćer. Nastala je strka, konfužjun. Zvali su se meju sebon odvitnici. Govorili, slušali, dogovarali se, svitovali svoje klijente i ondac je zaključeno da će jopet doputovat ćer, priuzest po'ranjene pineze i nać se s nećacin kod odvitnika i podilit se.
    Nećakova žena je rekla: - Ajme meni, u ča si se uvalija, čega si se privatija! Nima ništa o' tega. Zapanti! Ja ne ću njanci povirit kod nje, tako da znaš! -
    O cilega stana ostat će samo po, jerbo  je Bartulova ćer zakonita naslidnica svoga čače, vlasnika stana, u kojen je prin Domine živija s prvon ženon.
    ča se pineza tiče, Domina jema svoju ušteđevinu, a pok. Bartul je jema svoju ušteđevinu. ćer će je isto podilit s nećacin, ako se dogovoridu.
    U brigu kojon se obaveza, napisa i ovirija kod odvitnika, stavija je da će vazest Dominu kod sebe kući, dok ne dobije misto u domu. Sve to sad ispada za ništa. Samo za po stana!
Svitu moj, da ste vidili bisa, riči, trke, uviravanja, pritnje policjotin, novinarin. Nećaci su sve upregli za čapat pineze.
    A ča će tek bit kad vididu da stara karta koju jema u žepu ne vridi ni po boba, da je Domina u za'nju napravila dobro, kako i va'ja, za se i za Bartula. Pošteno.
    Bilo me straj pratit ovi, kako kažedu mladi, horror.
    Straj me i pomislit ča će sve Domina čut od nećaka, u ča će se pritvorit ta 'jubav' kad Domina ostane sa skromnin penšjunon i malon ušteđevinon, od koje ne će ostat ništa za luše.
    Grubo, svitu moj! ča će nan svi pinezi ovega svita ako nima juskosti, lipe riči, pinku smija, ako van nikor ne zaželi dobar dan, ako je sve u ten koliko i ča jemaš, kome 'š ostavit. Ajme!
    Znan ja da jema puno lipih pripovisti di judi 'partencu' pripremadu pomno i pazidu nikoga ne zaudobit.
    Ni uvik sve u pinezin i kućan. Jema lipi' za'njih že'ja i molitvica, poruka, koje nijedno vrime ne more izbrisat ni potrošit, na koje se znamo vratit i proštit i' sa suzan u očiman.
    Riči koje su ka za'nji zagr'jaj. Vične. Ka čačin blagoslov.