Na današnji dan sveti Anđela čuvara, mislin koliko jemaju posla, koliko puti gredu uzgor-nizgor, (pri)noseć naše zazive, a ondac se jopet vraćaju, donoseć nan nadu i blagost, koje će otupit ovozema'jski piz i naučit nas da ga pomnjivo uprtimo na se i nosimo, ako ikako moremo, a da ga drugi ne vididu. Jerbo svak jema svoj piz, to oće reć križ. Ko o' perušine, lagnji, ko težji, ma svak ga nosi kako more i zna.
    Jema judi koji su zaudobili na ti križ, koji odaju izgub'jeni, skupjajuć škovace, spremajuć i' u vriće i ondac i' nosidu kući. Da, kući? Judi moji! Ne znan kako bi se ti dil zem'je moga nazvat, ali se naša Kate onod vavik vraća. Vraća se napamet, jerbo višje ne vidi. Ne falije, a i ne zna ča je donila meju škovacan. Koji put karte, stare foje, prazne škatule o' konzerve…        Ma, bocun vina kupi u najbližji komeštibili.

 

 

   Jema li Kate svog Anđela čuvara? Jema. Jema i' višje, jerbo triba svako malo čekat kad Kate zakunja a ondac 'navalit' s crnin vrićan i skupit i' tako po osam i višje vrić odnit natrag u škovace, ma ne one prve nego pinku da'je, doklen Kate ne more arivat.
   Jučer je bija Međunarodni dan stari' judi. Nidir se feštalo, držala se misa za nji'. Na vrj Marmontove se besplatno mirija cukar, tlak, vadili se lipidi…
     Da mi je bilo vidit kolike lipide jema naša Kate!
     One su ovi dan, more bit, i slučajno pritvorile u feštu za Katu.
    Pâ je dogovor mobitelin meju ženskican i vozačon. Tonobil mora bit blizu te starine a vozač spreman u pravi čas. Ženskice, s crnin vrićan, tribaju 'navalit' i osvojit Katinu utvrdu, sve skupit, odnit, vratit se i očistit, a šporku robu stavit u vriću i odnit je oprat.
   Ona je poćirila kroz kjučanicu i vidila da Kate spava. Potla je stavila uvo i slušala, kako diše, davala jin mot da žvelto sve napravidu, kako in je rekla, dok se Kate ne počne movit po kamari. Da kamara? Ajme meni.
   Ondac se Kate polako pridigla i došla do vrat' o' kamare. Ona je odglumila da je iston došla. Pozdravi je, zagrli i pridloži jon da idu zaje'no vanka, čagod kupit, pojist, a kad se vratidu, ondac će je oprat i prominit, jerbo je u vrići donila čistu prisvlaku.
    - A oćemo li kupit vina? - pitala je Kate. - Nego ča? Sve ča triba. - odgovori jon ona.
    U dućanu je Kate omar išla vazest bocun vina, a ona je uzela drugi stvari. Govori ona Kati ča je vazela, a ona će 'jon: - Pa, ča si vazela kartu, ka da meni to triba? Samo trošiš. -
    - Guštan, Kate, za te trošit! -
   Inšoma, kad su se u dućanu dobro uprtile, nazove ona da čuje doklen su došle njezine s poslon i dozna  da jošćec nisu gotove. - Dobro je! Javite kad sve bude gotovo. -
   E, a sad te, Kate, pozivan na kavu. Sidnu one u jedan kafić, vanka, ispod tende. Ka prave dvi gospoje. Nikor ni pripozna Anđela čuvara. Popiju kavicu a Kate još i dva krafena. Pita nju Kate: - Jesi li ti jidna na me ča san ti za'nji put svašta govorila? Ajde, ajde! Nemoj se jidit na me! Zaudobi to! -
   U niko vrime, zazvoni mobitel i da sinjal da je sve gotovo i da se moredu vratit natrag.
   Uliza Kate. Ne vidi ništa. Ništa ne pita. Sve je dobro. Vadi bocun. Sprema ga na njegovo misto.
    - Sad ćemo se okupat i prominit. - rekla je ona. Kate je bila mirna. Sve si moga o' nje činit.
    Okolo ni bilo nikoga. Anđeli čuvari su odletili. Vozač je odnija vriće i šporku robu.
    Za uru vrimena prispija je i obid.
   Kate ne zna za feštu o' stari. Ne zna ni za svete Anđele čuvare. Ma, oni vavik dolazidu.         Spušćadu se i jopet penjedu gori, prinoseć Katinu bolešćinu i sirotinju prid Boga.
    Jer jubav je najjača.