Kad se dogodu grube stvari, ferman se i ne mogu da'je. Pritišče me. Budin se s njiman, odan i tako iz dana u dan.
    Otila bi se deliberat o' tega piza, ma, ni lako.
   Ono malo lipote, ča je čovik susritne i najde, ča bi je otija zaustavit i odmorit se uz nju, projde za čas, ka voda meju prstin.
    U situ svaki dan ostane nikoliko grumena. Ka da i' je nikor izvanka ubacija u nj i pobiga, pa žujadu život.
    Ne volin spominjat besidu đavla, ni vraga, ni sotonu. Ka dite strašila san se krampusa, ako nisan bila dobra.
   Ma, ono ča reste s nan i u nan, ono ča nas rastače, ubija čovika, maše s nan ka sa štracon, to je zlo. Ono je sve višje na prven mistu. Straj me to reć' al' je tako, di se god ošervaš. Nije ono u jednen društvu a u drugen ga nima. Ne, ono je svugdi, ka zrak ča ga udišemo. Koji put ga i mi dovedemo sa sebon u vižite. Ništa se ne dogodi prez da se ono ne priženta.
    Mislila san nike stvari zaklopit u se, ma ne mogu nikako okrenit novu stranicu i poć da'je.
Gren maknit barenko jedan grumen iz sita.

 

    Odan i jubin kornatsku zem'ju, po kojon su odili nesritni gasite'ji. Klanjan se njiovon dragovo'jnosti i famejan koje su rodile tak'e junake. Nek' jin Bog bude milostiv!
Samo su oni znali ča se dogodilo. Samo su se oni susrili s tornadon i s njegovon forcon iz zaside, koja i' je vatron zagrlila i pokorila zauvik.
    Potla tega, omar stvarat frontove, prozivjat, sudit, ko će višje i boje napadat po fojiman i drugin medijin, koliko godin prežuna za to dilo?…
    Vele misli od muzuviri ča nas vodidu, prid još većin izborin.
    To je teški grumen da ne more bit težji vengo je. Ondac to svit prati ka niku utakmicu, ka ono ko će koga. Sramujmo se!
    Samo struka vatrogas'va, izračuni i nalazi HDMZ i FESBa i drugi' struk' mogu reć ča se dogodilo.
    Drugo, ako se pogrišilo u ustroju, o ten ne ćemo u Gage, ni Ispod ure, a ni po Getu. Zna se di se ča radi ol' ne radi. 
    Ono ča je tribalo i ča triba, je pomoć famejan nastradali'.
    Jav'jajmo se na telefon 060/9009. Pomozimo ko more, darujuć koju kunu, ondac in dignimo spomenik.
    Molimo za dvojicu gasite'ja koji su još u životnoj opasnosti!
    Ne zaudobimo ča smo danas proštili, da je ovega lita bilo dvi ijade požari, koje su naši momci utrnili, ma nisu se ubili o ten pisat u fojiman ni govorit. More bit da to ni zanimjivo, jerbo su svi ostali živi. Bože oprosti! I mene je bokun vatra zavatila, a ona je skoro uvik zločesta.
    Ja bi našla mista i vrimena reć rič-dvi o požarin, koji su omar dan iza tega jopet bili u šibenskon kraju. Te bi slike ponavjala i pokazivala šporka, pocrnila lica gasite'ja, sa šmrkovin prema vatrenin stupoviman,  koje su polivali da ne priđedu cestu.
    Ta su lica ovi put ka nikad dosad, uz forcu pokazivala čemer i žal za prijatejiman koji su i' ostavili i smanjili nji'ovu skupinu. Ma, oni su danas, ka za dišpet, gasili i suzan, gasili jače i bo'je za Tomislava, Marka, Dina, Ivicu, Ivana, Gabrijela, Hrvoju, Antu, Marinka, Karla… Nisu se ofendili ni sakrili. Nastavili su posal ka da se ništa ni dogodilo.
    Samo su kacige na ormarin o' njiove opreme bile sinjal, da se oni ne odaziv'jedu, da ne obadaju sirenu, da su zauvik pobigli vatri i tornadu, u Očev mir.

 

    Upravo je prošlu nediju parilo ka da je Isus puno kruto reka nikoliko besid oniman koji su otili ić za njin, slidit ga. Ma, bilo je to vrime u kojen su se osićaji pokazivali samo  jubavju oli mržnjon. Meju tin osićajin ni bilo mista za nikakve mišance.
    Ni bilo ka sad, višje oli manje jubit, bit drag, višje oli manje, ne volit i sve dižgracje ča jedni drugin želimo: nevoju, nesriću, ne daj Bože, bolešćinu. Najskoli ta pošćapalica višje-manje je skoro u svakoj rečenici ča ćete je čut. To oće reć ka da more bit ovako i onako, kako te vo'ja, kako o'š, kako ti triba. Komodaj se.
   Bila je to lipa i poučna pripovid. Ma, danas, ne da je teško ić za Isuson, odreć se vele tega… Danas je teško odit za materon i za čačon.
    Zlo guca, uliza u kuće, fameje, zamanta sve. Sidi u uredništvu, u odborin. Skula je šala u kojon svi moraju ostat 'pačići mali', jer ondac s njiman mogu radit ča in padne na pamet.

    Ko? Zlo.
    Kako ću ga pripoznat? Ponovi Deset zapividi i zamisli se! Izajdi vanka i ne učini nikon ništa na žaj. Pogledaj se u tujen obrazu i vidi' ćeš kakvi si. Sigurno nisi onakvi kakvi misliš da jesi.

 

 

 

    Odpratili smo i poznatega pivača Pavarottija. Meni se parilo da je bilo vridno vidit i pratit misu zadušnicu, čut poznate pivače soliste, koji su došli poslidnji ga put pozdravit, odlični zbor, vidit i čut snimak, na kojen je Pavarotti piva zajedno sa svojin ocen.
    Izlazak iz crikve u Modeni, nadlitanje reoplanâ, ča su pustili tragove u kolurin talijanske bandire, koju je pokojnik pronosija cilin sviton, ka da su na njegov kapsil pustili pozdrave i suzu cile Italije.
    Lipo je bilo vidit da su kapsil s pokojnikon i pozan njin fameja, tonobilin išli na grobje. Za gledate'jstvo i okup'jeni svit isprid crikve sve je završilo kad i misa zadušnica.
    Ma, ono prez čega se ne more, pari mi se, je zlo i zloba po svaku cinu i na svaken mistu.     To oće reć ka da nemamo višje ni svetog mista. To se ne more dogodit. Žaj mi je.
   Bi li moga ol' ne reć misu zadušnicu za pok. Pavarottija da je na mistu modenskega biskupa (ne ću spominjat rečenicu kojoj ni misto tot di je izrečena), nije bilo ničije pitanje ni dvojba, pa je priko svake mire tako mislit altroke govorit.
    O'š-ne'š, zlo je opasno? Ono je u svaken od nas. Kad smo meškinjasti, ono je jače i guši nas. Kad smo jači, gušimo mi njega i ta borba vično traje.
    Zlo nima ni livu ni desnu bandu, ono je na svin bandan. Svagdi.
    Ono se dogodilo i u hramu, kad se Isus najidija i izbacija trgovce vanka, kad su tote činili ča nisu smili.
    Molimo da se Isus jopet ne najidi.


Split, 14. rujna 2007. god.