Ferman se nikidan s je'non ženskicon, koja se ka tendi u posle o' zdrav'ja i bolešćine, koja sve 'zna' ča triba, kad triba, i, ča je najgorje, ko ča triba radit.
Pogodi' ćete usridu kad rečete da se ta muzuvirica ni puno upotila i da take ne bi tribalo puno slušat, njanci i' obadavat.
Jemate prav. I ja tako mislin. Ma, jema jedan grop, koji me fermaje i ne da mi naprid. Ka da san se ukočenila o' čuda.
Kad smo se već fermale, oću jon reć koju o teškin i grubin sudbinan, o 'judin kojin nima ko pomoć. Spominjen i', pričan jon, kako i' je teško privolit na prigled kod likara, a kad privatu i dojdu prid njezine jude, čoviku dojde žaj ča in je zakuca na vrata.
Mislila san, kad jon ispripovidin, ovako iz prve, barenko dvi poslidnje priče, da će se smilit, da ću jon dotaknit dušu, ma ona se zakoprcala i udrila po jadnicin, po bolesnin, najskoli i onin ča cile dane radu i pomažedu in priživit.
Gospe moja! ča je ovo? S kin san se fermala? Ol' nisan znala da na ton indiricu ne ću nikad nać 'jusku rič?
Ni škuža, ma ovo zapišijen, jerbo sliči na puno drugi' kojin je posal pomoć i razumit čovika u nevo'ji.
Pari mi se da jon je bilo drago ča mi je mogla reć di triba s tin jadon i s tin nesriknjin sviton, a ne ovod u gradu, po nikin kamaran. - Ko je to vidija? Nji' triba stavit u Zemunike. To je misto za nji'. ča to čini Grad?
Zna se ko to triba radit, a ne ulizat u tuji posal i radit posal za koji nikor drugi prima plaću. ča se tu triba mišat nikor drugi? -
Ne zna ona da, ka ča su oni za stolon tako dobro povezani, da su i doli, niki mravi, uvik u dogovoru, da se pomažedu meju sebon, skupjadu mrvice sa njijovi' stolov i dilidu i' gladnin' judiman.
Mislila san da je prošlo vrime kad bi se reklo: - Ne ću radit, ma ne' š ni ti! - Zaradi koga tako govori? Ko je tako naučija? Ko tako oće? Ošervan se i sve i' largan. U sebi provan napravit red.
Bože moj! Kako si i' lipo štiva, kako figuraju, kako su svi dospili do stola, namirisali vlast i usidrili se? Di si i' naša tako iste? Oni mislidu da je sve s njiman počelo i da će s njiman završit.
Srića i Bog da svit koji pošteno radi, koji je blag i jema srce, ne triba tak'e čuvare ni njijova svitovanja. Oni znaju ča triba radit i ne more i' nikor fermat.
Ovi drugi ne tribaju nikad izać iz svoji ureda. Nji' ni njijovu pomoć nikor ne triba. Svit i' je pripozna i zapametija.
Ma, meni je puno žaj ča i' jema toliko ča sličidu na niku otvorenu klapu, oću reć, društvo, ča bi samo išli po predavanjiman, slušali tuje skule, u kojin je čovik posta tako malešan da ga se jedva vidi, ča bi rastočili dobro koje pomaže čoviku i prominilo mu ime. I ni to sve. Očedu da se njijovo provede i u našin rvackin kućan. Prikovišje je, pa ako je i iz Nizozemske.
Kako mi je bilo teško čut i gledat svit koji dobro i s dušon radi svoj posal i koji bi mora puno tega lipega i dobrega, u svon poslu s judin', prominit i fermat, da bi privatija tuje novotarije koje već rastaču srce i dušu?
ča će ostat o' nas i o' njizi, ako u poslu s dicon i starin, s betežnin judin duša dobije otkaz? Straj me.
Nemojmo grišit dušu i mislit da ova nesrića ima svoju bandu. Ne, ona je na sve bande. I ona je samo jedan mali dil o' posla, s kojin ćemo smanjit čovika i stavit ga, ako ikako moremo, na da'jinski upravjač, opredmetit ga, ka dil o' kašjuna.
Drugovačije je to kad čovik lista i minja konta u knjigovod'svu, kad radi s kartan. Ma kad, prid sebon jemaš dite joli čovika, to je puno grubo.
ča priostaje nego radit ka ča si radija? ča ti se more dogodit? Moreš postat višak, jer pizaš za dušu višje. A rekli su: - Duša ne triba! -
Godine 1968. dobila san otkaz u je'noj odgojnoj ustanovi, jer san, na pitanje nike divojke, odgovorila da se dobro najboje more naučit iz Svetoga pisma.
I ondac je duša bila ispod cine.
Nemojmo žalit ča nas Bog zove i diže. On to uvik čini na vrime, mlogo puta i u pravo vrime, kad se mira napuni jadon i čemeron, kad ne moreš ništa višje učinit ni prominit.
Kad duša dobije otkaz, nikor je taka u jubav. Načeja je.
Straj me.
Split, 11. kolovoza 2007. god.