Ivanica je bila iz siromaške kuće i siromašna se udala za siromaja. Ne sramuje se o ten pripovidat. Živili su pri zemji, u malešnon i siromašnen prostoru, ča se triba zvat ka kuća oli stan.  Ma u njen ni moglo stat ništa veliko, a kamoli armerun oli kredenca. Kad o ten priča, uža reć da jon je uvik najveća žeja bila da jemadu veli stol, za kojin će moć svi sist, gledat se i pripovidat, a i da ti stol bude pokriven velon tavajon. Ma kako će, kad veli stol ni moga ulist u tako malo mista.

 

 

    U braku se rodilo troje dice: dva muškardina i je'na ženskica. Muž je navigava. Ni bija spretan ka puno drugi'. Ni skupija pinez, a i ono ča je skupija, brzo je prosuja. Vratija se kući dišperan i od bumbete je umra prin vrimena.
    U kući se ništa ni' prominilo ni popravilo. Živilo se teško i siromašno.
   Kad su muškardini odresli i oni su se inbarkali. ćer se udala i rano umrila. Poza njon je osta vridan i pametan sin, koji je iša da'je na skule.
   Jedan je o' sinov s brodon doživija dižgracju i jedvac osta živ. Kad se približija vratin, Ivanica je pripoznala njegov korak. Zapantila ga je. Kako ne će!? Vrime je prolazilo čekajuć i' misecin.
Umoran, s mornarskon vričon na škini, uša je, pojubija mater i reka da višje ne gre na more. Brod se potopija, jedvac je spasija glavu. Kad se oporavija, ostavija je škoj, iša u grad tražit posal i naša ga. Jema svoju fameju. Svako slobodno vrime dolazidu materi na škoj.
    Drugi je sin osta navigat. Oženija se. Ne živi ni on višje na škoju, ma kad dojde, ondac svi gredu materi. Ona je njiovo najdraže i najboje.
   Sinovi su materi najprin napravili lipu malu kuću, ma propjo smišnu. Sad perfin jema i dvi škalinice za ulist u mali dvor, pa iz dvora u kuću. U zid o' kuće Ivanica je dala ugradit lipi kipić Srca Isusova. Poviše, u bili kamen urezano je: Srce Isusovo! Moli za nas! Unutra, s jedne strane, gori vično svitlo, a s druge je strane Ivanica stavila malu vazu i u njon cviće. Na jednen kartoncinu je, kemijskon olovkon napisala: - Srce Isusovo! Zafa'jujen Ti na svin milostin ča si mi i' da u životu. - i potpisala se. Kartoncin je naslonila na kip.
    Sad je finalmente doša na red i veli stol, draga i vela Ivaničina že'ja. Veli stol i tavaja.
   Pripovidajuć jopet susidin, koji na lito dojdu na škoj, o životu i kako je dočekala kućicu o' sinov, najskoli veli stol, vrati se jedan čas u kuću, vazme u ruke lipo složenu, već požmarivenu, staru velu tavaju, pokaže je sviman i ispripovidi kako je u ono doba teška siromaštva bila su svoja dva brata u Splitu i da je u jednen dućanu kraj peškarije u izlogu vidila jednu lipu velu tavaju. Rekla in je da bi jon mogli kupit tu tavaju po pola, da polovinu plati jedan a drugu polovinu drugi brat. Kaže da je jedan bija škrčina i ti je počeja pritraživat žepe i za malo je reka da plati oni drugi brat, jerbo da nima kod sebe, pa će mu on vratit. Ovo je ta tavaja. Oni ča je pribira po žepin, nikad ni da ni cente, ni platija svoj dil.
    Ono nikoliko tavaja ča i jema ne more pokrit ovi veli stol, samo ova stara žmarivena. Ma, Ivanica je drži i čuva ka relikviju. To je njezina dota i ona je ponosna na to žmariveno siromaštvo.

 

 

    Susida koja iz Zagreba dolazi na škoj, Ivanici će, za Bozič, kupit i poslat dvi velike tavaje za novi stol, da ga pokrije, kad se skupidu fameje sinov i unučad. Kad se zapali božična svića i zapiva U se vrime godišća, a Ivanica, ka najstarija, zafali Novorojenomu i blagos'ovi oto zajedniš'vo jubavi, dodirujuć' s jubav'ju veli stol i novu tavaju, koje je cili život želila, ma ne da sidi sama, vengo ovako, ka sada, da se gledadu u joči, da se vididu, razgovaradu…, da su zaje'no.
    Ivanica je ka dite virovala i mislila da stol služi zato da svit sidne okolo njega, da se meju sebon gleda, razgovara, moli, ji… Sad se njezina že'ja ispunila.
   Ivanica koja se ne sramuje i ne zaborav'ja da je bila sirotinja, da je živila prez kuće, pri zemji, koja se ni prominila zarad tega ča su jon sinovi napravili kućicu, ni radi tega ča jema veli stol.
    Ivanica i sad voli i razumi sirotinju a za ništa nikon ne bi dala svoju staru žmarivenu tavaju, svoj dragi trag.