Dobro dojdu ove godine, ovo vrime i nebo koje nikad ni isto dok crta oblake, misi nijanse debje i tanje, razvučije i ka tisto, pituraje s paleton koluri kakve ne moš nać ni u butigu kod Elze.

Dobro, puno dobro dojde ovo vrime koje te okrene o'š ne' š na stranu, di' š uvik nabasat samo na se, na se se najidit, sebi pribrokat.

Ferman pinku: Gospe moja o Zlatni vrat, smiluj se skitnican, ovon izgubjenon svitu ća ne zna di se uputija, ko ga vodi, di gre, kad će fermat, pa zaokrenen niz Dioklecijanovu na Peristil, zna se - u Luxora.

Jučer je Čovik, ne gledajuć, otvorija vrata i uz skale se popela jedna mala lipotica. Kaže, lipa ka anđelin, nije zna ća bi reka o čuda. U veštici, bosa. Govori engleški, ma je nikor ni razumija, pa je pozdravila i vratila se nazad. Kako ti se to dogodilo, ća nisi pita na parlafon ko je, a Čovik mislija da je zvonila unuka, da je more bit noćarila s klapon. Ma, nije. Mala je bila u svojoj koćeti.

U noći je bilo, ne ludo, ne vedro, vengo opasno. Toliko arleukanja i skakanja, sigurno predoziranega mlajega svita, da su se probudila dičica iz susistva i plakala o' straja. Provala san razumit njiov govor, besidu koju, ali ne, nima tu beside. Bija je to demonštracjun force ka vražjega zbora u pohodu na grad. Noć je grmila. Poslin malo vrimena dospile su i ženske junakinje, raspamećene, pijane i pari mi se - bija je to sve strani svit. Sitila san se, kako je pametan bija stari Split, s vratin o grada koje bi navečer zakjučava. Dojde mi u niku uru deboto, da se zdignen i gren i zatvorit. Ma nima višje, ni vrata ni kjuča. Svemu otvoreni.

Iz sinoćnje emisije, dojde mi u pamet misal jednega znanstvenika: Ovo je vrime perfidnog totalitarizma, podmuklega, najgrubjeg, koji je do sada bija na svitu i zato ga je teško pripoznat. On, ka bolest koja tilo razara, razara obitej, a ondac i društvo. Ko to more fermat? Ća smo dočekali, di smo falili, ko je zaguca ovako grubu i otrovnu  ješku?

Naš Čovik je jutros otiša na svoju poštu čagod ulovit, ma tamo je naša kruzera koji će se tu dobro ražentat, izbacit škovace i šporkižu, deterđente i sve moguće otrove. Riba će prominit spizu i kolur, a mi ćemo se ličit o neizličive bolešćine. A oni, kad se vraćadu na brod, najprin moradu dezinfetat ruke, da nisu čakod čapali kod nas. E, moj svitu!

Sad jopet novitad: Ariva niki komarac sa zapadnega Nila i doša u Srbiju, pa omar i nas zasrbija. Likari govoridu o perikulu. To ća je komarac ariva prin u Srbiju vengo kod nas, ne tribamo bit đeložasti. Za nji zna cili svit i zna da i oni znaju za nas i da nas nikad ne će zaudobit, pa su omar poslali jednega i nan, oću reć komarca. Jesmo li region oli nismo, pa ondac triba sve podilit ka da smo na marendi kod prešidenta.

Pitan, ća tribaju bombe i minobacači, ća će nan rakete, kad moremo s nikoliko komaraca ubit cilu naciju. Ondac nan višje ni triba, ni vojska ni naoružanje, njanci reoplani.  Jeftiniji i boji su zoolozi s malin formacijama nilskih komaraca i eto ti „mirnega i šparenjožastoga rata“. Omar jeno ministarstvo manje.

Ni tribalo plaćat 500 muzuviri izvanka koji će nas pojist i domaće savitodavce za pokop Rvacke. Mi smo pokazali da to i sami moremo sa i prez HTV i medija i to činimo svaki dan.
A sve je moglo bit drugovačije i boje.

Ma, da ne završi sve tako crno i beznadno, evo lipega litrata strpjive Božje dominikanke. Prolazin kroz Get, pozdravjan ka svako jutro Gospin vitraj u zidu,  a doli, sagnuta stara dominikanka, u jednoj ruci s vrićicon, u drugoj, ka s nikin gvozdenin dliton skida crnilo zalipjeno na starin pločan od zgnječeni žvakalic. Čisti ona, nikor će more bit vidit i bit će mu žaj i ne će višje tu šporkavat. More bit.

Ponizna švorica će puna Božje pacijence i jubavi čistit Gospin prolaz i minjat cviću vodu. Sve na slavu i čast našoj Gospi o Zlatni vrat u Getu.