Reka bi čovik: - Bičikleta ka bičikleta. ča triba pripovidat? -
Znan, nikor na bičikleti projde di ga voja, meju svit, po trotoaru, ulican, kaletan, napravi posal, kupi ča triba i vrati se kući…
Dica na bičikletan, za divertimenat, činidu utrke, di in padne napamet, a pari mi se, da in je najdražje po kaletan. Samo ča nas ne sataru.
Fala Bogu,  jema i oni' ča prispiju do Zvončaca oli do Instituta pa napravidu cili đir okolo Merjana.
Po lipen vrimenu, šerjasti svit dojde na bičikletan na Merjan, ol' s tonobilon, pa iz portapaka izvadi bičikletu i uputi se Merjanskon lipoticon.
Drugi unajmidu bičikletu na uru-dvi i guštaju puten, udišuć' arju i vonje o'borovine.

 

Ma, jema je'na bičikleta koja nikad ne gre na Merjan. Nima kad vatat arju. Vere se po gradu, fermaje na puste indirice, uliza u portune, prizem'ja i buže di je čekadu 'judi. Svi bi otili bit prvi i jedini a ona i' svi pazi i kokolaje ka da su jon dica.
Ta bičikleta vozi jednako po kiši i po zvizdanu.
Žaj mi je bilo, kad su je prin dvi godine litratali da vozi uzbrdo, jer se omar doznalo da ni spli'sko dite, iako tot živi četrdes' godin. Di bi naš čovik vozija uzbrdo? Ne bi ni za jutu potribu, a kamoli za drugega. I joščec po susnižici koja je bila ti dan…
Inšoma, u kofi isprid timuna uvik ništo prinaša. Oš' spizu, oš' likarije, oš' robe, dašćice za čagod popravit ol' nadožuntat… Vozi, fala Bogu, i škovace kad uredi koju bužu. Šesno i' zamota i vozi do prve kante, koji put i do kuće, pa i' tamo baci u kantu.
Na svojin štacijan bičikletu mora vezat, jerbo su jon je'nu vazeli i nikad je ni našla. Ma Kuća je omar sutradan kupila drugu, jerbo zna ča to znači, u potribi i priši, za ovi nevo'jni stari svit.
(More bit će nikor pitat zašto se taken čoviku ne da tonobil. Dâ bi se, sve bi se dalo, ma vozač ove bičiklete ne vidi na je'no joko. Ma s tin je'nin vidi boje vengo ja sa četiri).
Vidi' ćete zašto danas pišen o najdražjoj bičikleti na svitu. Zaradi jednega običnega, ma žalosnega događaja i jednega neobičnega i radosnega doživ'jaja.
Kad se ujutro, popodne ol' pridvečer uredi, opere bolesnega čovika, pospremi se i prostor okolo njega, dobro se zapaka ča je za bacit (ne ćemo sad o temu, o pelinican) i stavi se jopet, a di, vengo u kofu o' bičiklete.
Je'nu večer ostane vezana bičikleta za stup. Bičiklist u za'nji čas prispije na Večernju, zafali se  i pomoli Bogu za dan koji je proša. Potla mise gre o'kjučat bičikletu i vidi praznu kofu. Ajme meni! Gospe moja, bidnega svita. Sve vazimje. I to se opetuje, ča oće reć, da se to ni dogodilo prvi put. Škovace i šporkica su 'juski i redno zamotani. Bog zna, ča svit misli, ča će nać unutra?
Ma kad je danas potla posla jopet odveživala bičikletu, učini jon se, da vidi u kofi ništo malešnega.

 

 

 

Dojde bližje a ono u kofi figurin malega anđela o' keramike, ča na ispruženin rukan nosi zlatnu zvizdicu. Pokažije mi ga. Drag jon a i meni. Ka niki sinjal, rič, poruka?
Meju toliko dobrega svita, posla s betežnin i zaborav'jenin, posla za bližjega; teškega, ma i šporkega posla - nikor jon je u kofu spustija anđelića.
'Judi moji! Ne ću van ništa reć. Mislite ča vas vo'ja, ma ja mislin da je to nikor otija reć: - Fala! -
Rekla san jon da ga čuva a ona ga je dala meni. Jema 3,5 centimetra. Evo ga ovod, kraj mene, a evo ga i van. Litratali smo ga. Mirita.
Božji sirotan na buri, u kofi o' bičiklete. Zvizdica svitli nadu.