Da otkjučan katanac, skalan barenko pinku piza i sakrijen ga ovod di ga nikor ne će nać i jopet ga zakjučan? Ovod, unutra.
    To je i naša Mater činila, a mi dica nismo ništa kapili.
   Koji put nisan mogla razumit koliko more podnit. Kad je umrila, prid jočin su mi se pokazale nike trpeće stranice koje nikad i nikor ni uspija proštit a kamoli razumit. Sve su one bile štivane u starin molitvenicin Gospe Žalosne i Vinčiću sv. Ante Padovanskeg, u svetin sličican sa posvetan napisanin lapišon koje se jedvac moredu proštit, joli sa starin crnilon, koje su jon darivale njezine tete švore-klarise.
    Fala Ti Majko, ča si me naučila spremat i tišćat jad i tiskobu, ča nikon ne triba, nima cinu, ni u modi, ča si mi pokazala pravo misto, na kojen ću i' čuvat šekreto i dolazit kad mi ne bude lako. Sakrivena, unjulo.
    Evo me ovod.

 

    Kad se dogodila ona strašna nesrića na Kornatu, ča je spržila toliku mlajariju, ka da me je nikor žestoko uščipnija za srce i ne moren jur ni danas razumit nike stvari. I gotovo. Da bi mogla odit da'je, moran i' reć.
    Ne ću o duševnon boli, jerbo  se ona ričin ne more izreć.
  U ovo nesriknje vrime, svaki se čas dogodi da mladić pogine, ubije ga nikor, obisi se, nastrada. O teškin bolešćinan, koje i' svaki dan vazimju, da i ne govorin.
  Toliko nevoje da je malo svita koji ni okusija bol u svojon fameji i užga lumin kraj litrata nikoga o' najbližji'.

  Uime svega tega, najskoli radi gluvega mira, kad cilo misto umukne, kad samo crkveno zvono zabreca, a škure su zaklopjene, kad je svak zavijen u svoju nevoju i bol, neka se nikor ne najidi ča ću sad ponovit nika pitanja koja svaki dan postavjan samon sebi i na koja ne moren nać pravi odgovor, oli mogu, ma on ni dobar ni kako triba.
   Nima višje izventavanja, ni mi lako, ma moran počet.

  Dunkve, o pretrpjenon duševnoj boli, koja nikad ne će izlapit iz duš nesriknji roditeja i svojte, ne ću reć ni besidu.
  Ma, oću reć i pitat sve vas koji se najdete na ovoj stranici, kako se more dogodit u taken očaju i boli, taki bîs da iz čovika istira mir? Je li ti mir i prin tega bija mršav joli ga ni bilo? Ti bîs ka da se dâ uzjašit snagon koja je okrenila pažnju od žrtav' i juriša oteć bit sudac, tražit pravicu, skidat glave.
   Kako se more dogodit, koja je to forca ča je mater nesriknjeg vatrogasca dva-tri dana poslin nesriće donila i prižentala prid televizijsku kameru da govori, žali, tuži, ča je reka ovi joli oni, ko je kriv… ?
   Oklen ta forca, di gre, i,  najskoli, di će dospit? ča će dobit?
   Da priskočin  sva novinska na(d)metanja i TV emisiju di voditejica cilo vrime vraća sudionike i podsića i' ko je kriv, ko je falija… i samo ča in ne šapje u uvo ime koje triba reć?
  Priskočit ću i žalosno sićanje, tužne ispraćaje, sve vlasti i njine pristavnike 'ko će boje ko će prije, ko će višje …' Neka svak misli svoje kako najboje zna.
  Ma, ja ću reć kako san se zanji put privarila. Da za'nji? Privarit ću se ja još mijun puti, jer ne znan drugovačije mislit.
  Štijen portal, pari mi se, Večernjega i vidin jopet o vatrogascin i Kornatin. Jutros vidin i sliku užgane zemje, roditeje, fameje… Zapalili sviće i dok one goridu oni vazimju kamen, zemju, niku rastopjenu mlaznicu, tako je pisalo u tin fojiman…
  A ja, ka bena, promislin, vidiš, da će ti bidni svit sad vazest pinku zemje i koji kamen, pa donit doma, u dvor joli vrtal, iskopat rupu i posadit niku mladicu koja će rest ka ča su resla njiova dica i bit vično sićanje na dan kad su i' izgubili.
  Ma ne, svitu moj, bîs i' je doveja, svića je gorila za se, za one ča su i' gledali ozgar i čudili se, ča njiovi tražidu, ča činidu tote. Oni su skupjali kamen i zemju, more bit još koji dil zaosta iz vatre, jer će oni istražit, oni će napravit ča triba, oni znaju ko je kriv, znaju ča se dogodilo, oni znaju istinu.
  Znan da su se kraj sviće i pomolili, ma bîs je pritega dobro. Miru ni bilo mista i oni su jopet po fojin. Zašto? Zarad koga? ča to znači?
  Ondac smo proštili da se ubija i profešur koji je stradalon mlajariji bija ka čača, koji je i osnova dobrovojno vatrogasno društvo u Vodican. Njegovo srce ni moglo izdurat toliku nesriću. Foji pišedu 'od pritiska'.  Ma koji pritisak?
  Osta je još jedan vatrogasac, pišedu, da je boje ali… vidit ćemo.
  Projden kraj trafike, a ono na naslovnici nika slika, muž i žena u crno, piše prezime i dvi točke: oni znaju istinu.
   Gospe moja, ča je ovo? Nima kraja.
  Je li to sve? Bi li se ti nesritni svit smirija i bija kuntenat, kad bi policija prežune napunila judin koji su falili oli propustili čagod napravit, pa bili oni mišćani oli županijski i državni judi-krivci?
  Ne znan, znan samo da su dica zauvik partila iz ovozemnega života i da i' nikor višje ne će vratit.
  Zašto smo taki, prazni u vrime kad tribamo bit fudrani nadon i prošnjan, zašto zazivjemo zlo i osvetu, zašto na rane stavjamo kvasinu?

 

 

  Di je mir u kojen ćemo se sabrat, odbolit bol, molit kraj lumina i litrata sinov koji su u jednen danu postali naši braniteji. Ko će to učinit ako ćemo svi jurišat, svi istraživat, svi ganjat svakega?
 Di ste svitu? Di ste bližnji? Di je du'ovna, duševna pomoć? Nalazite li se? Molite li za njiov pokoj vičnji, ne samo na misan?
 Molite za mir, mir meju van, ondac meju cilin sviton! Da se foji očistu od škovac, od otrova. Nigdi ne vidin ni riči o temu. To, ka ni za pisat. Nan tribaju samo 'delicije'.
  Pratin jutros prijateja na put u Kanadu. Pričan mu o ovin teškin mislin i pitan ga ča on misli, di je grij, ča je ove tužne fameje štivalo i odvelo u potragu za 'krivcin'. On mi reče da mu se pari da je to ona velika misal izrečena od glavnega čovika, po prilici, ka da je mlajarija odvedena u pustolovinu gasit niku travu. Lipo bome. Ne more boje.
  Oko takve vele misli triba podilit svit, jer mi to najboje znamo. Ako i ne znamo najboje, ima nas ko naučit. Jemamo foje i televiziju, prid kojin je oni tornado ča je napravija vatreno kolo oko nastradali vatrogasac, sitnica.
  Ovi je tornado ča još dura i ne pristaje mavat s tuđin nevojan i brisat in tugu, naša sramota.
  Zato teplo priporučan sve fameje poginuli' vatrogasac i profešura DCD Vodic u naše molitve, da in Bog pomogne i da snage, najskoli tako potriban mir. Samo On more fermat tornado ča se razmava po oven kraju, ka ča je ferma valove na moru i umirija pristrašene učenike.
 Ne zaudobimo! Puno je puti, tepla judska rič i ruka suosićaja, dilotvornija likarija o' svake politike i svi' pinezi ovega svita.
  Zato, ako smo dikod ukrali mir, vratimo ga nazad i škužajmo se.

Split, 21. rujna 2007.